கையெழுத்து இயக்கங்கள் சரித்திரத்தை மாற்றியதுண்டு, அதிமுக-பாஜக முகத்திரையை கிழிக்க வேண்டும்-ஸ்டாலின்

சென்னை, பிப்ரவரி-04

பாஜக – அதிமுக கூட்டணி கைகோத்து அரங்கேற்றி இருக்கும் ‘குடியுரிமைத் திருத்தச் சட்டம்’ என்ற பச்சைத் துரோகத்தை மக்கள் மன்றத்தில் எடுத்துச் சொல்லி, மத்திய – மாநில ஆட்சியாளர்களது முகத்திரையை கிழித்தெறியும் மாபெரும் மக்கள் இயக்கமாக இந்தக் கையெழுத்து இயக்கத்தை மாற்றிடும் வகையில் திமுக தொண்டர்கள் முனைப்புடன் முழுவீச்சில் பணியாற்ற வேண்டும்” என்று மு.க.ஸ்டாலின் அறிவுறுத்தியுள்ளார்

இது தொடர்பாக, மு.க.ஸ்டாலின் தொண்டர்களுக்கு எழுதியுள்ள கடிதத்தில் கூறியுள்ளதாவது: ”குடியுரிமைத் திருத்தச் சட்டத்தை திரும்பப் பெறவும், என்.ஆர்.சி.க்கு வழி கோலும் என்.பி.ஆர் தயாரிப்பதை நிறுத்த கோரியும் 24.1.2020 அன்று எனது தலைமையில் நடைபெற்ற அனைத்து கட்சி தலைவர்கள் கூட்டத்தில், தமிழகம் முழுவதும் பிப்ரவரி 2 முதல் 8 ஆம் தேதி வரை மாபெரும் கையெழுத்து இயக்கம் நடத்துவது என்று தீர்மானிக்கப்பட்டு- அதன் அடிப்படையில், நான் முதன் முதலில் கொளத்தூர் சட்டப்பேரவை தொகுதியில் இந்த கையெழுத்து இயக்கத்தை தொடங்கி வைத்தேன்.

என்னுடைய சட்டப்பேரவை தொகுதியில் நானே சென்று மக்களை சந்தித்து- அவர்களிடம் இந்த கையெழுத்து இயக்கம் பற்றி எடுத்து சொல்லி- கையெழுத்து பெற்றேன். அதை போலவே அனைத்து கட்சி தலைவர்களும் ஆங்காங்கே தொடங்கி வைத்து- தமிழகம் முழுவதும் இந்த கையெழுத்து இயக்கம் தீவிரமாக நடைபெறுகிறது.

இன்று வழக்கம் போல் காலையில் “முரசொலி” அலுவலகம் செல்லும் வழியில், தேனாம்பேட்டை எல்டாம்ஸ் சாலை பகுதியில், நம் தொண்டர்கள் கையெழுத்து இயக்கம் நடத்தி கொண்டிருந்ததை பார்த்த நான்- காரிலிருந்து இறங்கி சென்று, தொண்டர்களோடு நானும் ஒரு தொண்டன் என்ற முறையில் இணைந்து கலந்து கொண்டு கையெழுத்துகளை பெற்றேன்.

அப்போது ஏன் இந்த கையெழுத்து என்பதை மக்களிடம் விளக்கி- கையெழுத்து போட இயலாதவர்களிடம் கைரேகை இடுவதற்கு வாய்ப்பை ஏற்படுத்தி கொடுத்து- இந்த கையெழுத்து இயக்கம், மகத்தான மக்கள் இயக்கமாக நடைபெற வேண்டும் என்ற ஆர்வத்தை திமுக தொண்டர்கள் மத்தியில் ஏற்படுத்தி விட்டு, அங்கிருந்து நான் முரசொலி அலுவலகத்திற்கு புறப்பட்டு சென்றேன்.

ஒவ்வொரு மாவட்டத்திலும் மக்களை, கிராமம் கிராமமாக திண்ணை பிரச்சாரம் போலவும், நகர்ப்புறம் என்றால் வீதி வீதியாகவும் சந்தித்து, குடியுரிமை திருத்த சட்டத்திற்கு வாக்களித்த அதிமுகவின் துரோகத்தையும், இந்த சட்டத்தை கொண்டு வந்து சமூக நல்லிணக்கத்துடன் வாழும் அனைத்து சமுதாய மக்களையும் பிளவுபடுத்தும் மத்திய பாஜக அரசின் வஞ்சகத்தையும் விளக்கிட வேண்டும். திமுகவின் சார்பில் கொடுக்கப்பட்டுள்ள துண்டு பிரசுரங்களை வழங்கிட வேண்டும்.

ஏதோ கையெழுத்து பெறுகிறோம் என்று இந்த இயக்கத்தை இயந்திர கதியில் நடத்தாமல்- ஒவ்வொரு கையெழுத்தை போடுவோரும் பாஜக-அதிமுகவின் துரோகத்தை புரிந்து கொள்ளும் நிலையை உருவாக்கி- இந்த பிரச்சாரம் பட்டிதொட்டிகளுக்கும் செல்லும் வகையில், இந்த கையெழுத்து இயக்கம், உணர்வுபூர்வமாகவும் அறிவுபூர்வமாகவும், மக்களின் பேரியக்கமாக பெருக்கெடுத்து நடைபெற்றிட வேண்டும் என்று மீண்டும் வலியுறுத்திக் கேட்டுக் கொள்கிறேன்.

கையெழுத்து இயக்கங்கள் சரித்திரத்தை மாற்றியதற்கு, பல உதாரணங்கள் உண்டு. ஆகவே பாஜக- அதிமுகவின் துரோகத்தை தமிழக மக்களுக்கு உணர வைத்து – இந்த குடியுரிமை திருத்த சட்டத்தை திரும்பப் பெறவும், என்.ஆர்.சி.க்கு வழிகோலும் என்.பி.ஆர் தயாரிப்பதை நிறுத்தி வைக்கவும் திமுக தொண்டர்கள் பெறும் ஒவ்வொரு கையெழுத்தும் உறுதிமிக்க ஒரு தூணாக நிற்கும்.

அந்த வகையில் தொடர்ந்து பிப்ரவரி 8 ஆம் தேதி வரை கையெழுத்து இயக்கத்தை வெற்றிகரமாக நடத்தி- பிப்ரவரி 9 அல்லது 10 ஆம் தேதிக்குள் அனைத்து கையெழுத்துப் படிவங்களையும் திமுக தலைமைக் கழகத்திற்கு அனுப்பிட வேண்டும். அந்த ஒரு கோடி கையெழுத்துகளையும் எடுத்து கொண்டு- டெல்லி சென்று- திமுக தலைமையிலான அனைத்து கட்சிகளின் நாடாளுமன்ற உறுப்பினர்களும், குடியரசு தலைவரை சந்தித்து, இந்த குடியுரிமை திருத்த சட்டத்தை திரும்பப் பெற வேண்டும் என்று வலியுறுத்துவார்கள்.

ஆகவே பாஜக- அதிமுக கூட்டணி கை கோத்து தமிழக மக்களுக்கு செய்துள்ள மன்னிக்க முடியாத இந்த பச்சை துரோகத்தை, மக்கள் மன்றத்திற்கு கொண்டு சென்று விளக்கிடும்- இந்த மாபெரும் கையெழுத்து இயக்கம்- மக்கள் கடலை தன்பால் ஈர்த்த தனிப்பெரும் இயக்கம் என்ற பெயரினைப் பெற்றிடும் வகையில், திமுக தொண்டர்கள் தொடர்ந்து உழைத்திட வேண்டும்.

கடந்த இரு நாட்களாக இருந்த சுறுசுறுப்பைக் காட்டிலும், அதிக ஆர்வத்துடன் நடத்தி, ஆணவ பாஜக ஆட்சி மற்றும் மாநிலத்தில் உள்ள அராஜக அதிமுக ஆட்சி ஆகியவற்றின் முகமூடியை மக்கள் மத்தியில் கிழித்தெறியும் வகையில் கழகத் தொண்டர்கள் முனைப்புடன்- முழு வீச்சில் பணியாற்றிட வேண்டும் என்றும்- ஒரு கோடி கையெழுத்து என்ன அதற்கு மேலும் பெற்றுவிட்டோம் என்ற வெற்றிச் செய்தியுடன் கையெழுத்துப் படிவங்கள்- அண்ணா அறிவாலயத்திற்கு அலைகளைப் போல வந்து மலைபோலக் குவிந்திட வேண்டும் என்றும் கேட்டுக் கொள்கிறேன்” இவ்வாறு ஸ்டாலின் தெரிவித்துள்ளார்.

Leave a Reply

Your email address will not be published. Required fields are marked *