என்னால் மன்னிப்பு கேட்க முடியாது-ரஜினிகாந்த் திட்டவட்டம்

சென்னை, ஜனவரி-21

பெரியார் குறித்துப் பேசிய கருத்துகளுக்கு மன்னிப்பு கேட்க முடியாது என்று ரஜினி உறுதிபடத் தெரிவித்தார்.

சமீபத்தில் நடைபெற்ற துக்ளக் 50-வது ஆண்டு விழாவில், பெரியார் தொடர்பான சில கருத்துகளை தனது பேச்சில் ரஜினிகாந்த் முன்வைத்தார். அவ்வாறான சம்பவங்கள் எதுவும் நடக்கவில்லை. ரஜினி மன்னிப்பு கோரவேண்டும் என்று பல்வேறு அரசியல் கட்சித் தலைவர்கள், பெரியார் உணர்வாளர்கள் கருத்து தெரிவித்துள்ளனர்.

மேலும், ரஜினி மன்னிப்பு கேட்காவிட்டால் அவரது வீட்டை முற்றுகையிடும் போராட்டம் ஜனவரி 23-ம் தேதி நடைபெறும் என்று பெரியார் திராவிடர் கழகம் அறிவித்துள்ளது.

இந்த சர்ச்சைக்கு முற்றுப்புள்ளி வைக்கும் விதமாக ரஜினி இன்று (ஜனவரி 21) பத்திரிகையாளர்களை தனது இல்லத்தில் சந்தித்தார். அப்போது ரஜினி பேசியதாவது: “துக்ளக் 50-வது ஆண்டு விழாவில் நான் பேசியது சர்ச்சையாகி இருக்கிறது. நான் சொன்ன மாதிரியான நிகழ்வு நடக்கவில்லை என்று சொல்கிறார்கள். அவுட்லுக் பத்திரிகையில் என்ன நடந்தது என்பதை எழுதியிருக்கிறார்கள்.

அந்த ஊர்வலத்தில் ராமர் – சீதையை உடையில்லாமல் செருப்பு மாலை அணிந்து கொண்டு வந்திருக்கிறார்கள் என்பது பத்திரிகையிலேயே வந்திருக்கிறது. இல்லாத விஷயத்தை நான் ஒன்றும் சொல்லவில்லை. கற்பனையாகவும் சொல்லவில்லை. மற்றவர்கள் சொன்னதையும், இதில் வந்ததையும்தான் சொல்லியிருக்கிறேன்.

நான் இல்லாத ஒன்றை சொல்லியிருக்கிறேன் என்று சர்ச்சையாகி கொண்டிருக்கிறது. கேள்விப்பட்டதையும், பத்திரிகைகளில் வந்ததையும்தான் சொல்லியிருக்கிறேன். இதற்கு மன்னிப்பு கேட்க வேண்டும் என்று சொல்லிக் கொண்டிருக்கிறார்கள். நான் மன்னிப்பு கேட்க முடியாது. வருத்தமும் தெரிவிக்க முடியாது என்பதைத் தாழ்மையுடன் சொல்லிக் கொள்கிறேன்”. இவ்வாறு ரஜினி தெரிவித்தார்.

அதனைத் தொடர்ந்து பத்திரிகையாளர்கள் ரஜினியிடம் சில கேள்விகளை முன்வைத்தனர். அதற்கு ரஜினி அளித்த பதில்கள் பின்வருமாறு:

வீட்டை முற்றுகையிடும் போராட்டம் என்று சொல்லியிருக்கிறார்கள். உங்களுடைய அரசியல் வருகைக்கு பயத்தை உருவாக்கும் முயற்சியாக பார்க்கிறீர்களா?

இதை நீங்கள் அவர்களிடம்தான் கேட்க வேண்டும்.

திருமாவளவன் உள்ளிட்டோரும் இது தவறான கருத்து என்று சொல்லியிருக்கிறாரே?

நான்தான் தெளிவாகப் பதிலளிவித்துவிட்டேனே….

அந்த தருணத்தில் இருந்தவர்கள் கூட ஆதாரத்துடன் சமூக வலைதளத்தில் பதிவிட்டு வருகிறார்களே?

நான் பார்த்ததைச் சொல்கிறேன். அவர்கள் பார்த்ததை அவர்கள் சொல்கிறார்கள்.

மூட நம்பிக்கைக்கு எதிரான பேரணிக்கு தான் செருப்பு வீசினார்கள் என்கிறார்கள். வரலாற்றை ரஜினி மாற்றி பேசுகிறார் என்ற கருத்து முன்வைக்கப்படுகிறதே?

தெளிவாகச் சொல்லிவிட்டேன். நீங்களே மறுபடியும் கிளறுகிறீர்கள். அதிருப்தியான சில சம்பவங்களை மறுபடியும் மறுபடியும் நாம் பேசக் கூடாது. இது மறுக்கக் கூடிய சம்பவம் அல்ல. மறக்கக் கூடிய சம்பவம்.

Leave a Reply

Your email address will not be published. Required fields are marked *