மேயர் பதவிக்கு மறைமுக தேர்தல்: அமைச்சரவையில் முடிவு?

சென்னை, நவம்பர்-19

தமிழகத்தில் உள்ளாட்சி தேர்தல் நடைபெறும் தேதி டிசம்பர் 2 -ஆம் தேதிக்குள் வெளியாகும் எதிர்பார்க்கப்படுகிறது.
இந்த நிலையில், தமிழக அமைச்சரவைக் கூட்டம், முதல்வர் எடப்பாடி பழனிசாமி தலைமையில், சென்னை தலைமைச் செயலகத்தில் நடைபெற்றது.

இக்கூட்டத்தில், சர்க்கரை பிரதானமாக வழங்கப்படும் ரேஷன் அட்டைகளை அரிசி ரேஷன் அட்டைகளாக மாற்ற அனுமதி அளிப்பது, சொத்து வரி உயர்வு நிறுத்திவைப்பு உள்ளிட்ட பல்வேறு முக்கிய பிரச்சனைகள் குறித்து விவாதிக்கப்பட்டதாக தெரிகிறது.

முக்கியமாக, உள்ளாட்சித் தேர்தலில் மாநகராட்சி மேயர், நகராட்சி தலைவர் பதவிகளுக்கு முறைமுக தேர்தல் முறையை மீண்டும் கொண்டு வருவதென முடிவு செய்யப்பட்டுள்ளதாக தகவல்கள் வெளியாகியுள்ளன.

அதாவது, மாநகராட்சி மேயர், நகராட்சி தலைவர் பதவிகளுக்கான பிரதிநிதிகளை பொதுமக்கள் நேரடியாக வாக்களித்து தேர்ந்தெடுப்பதற்கு பதிலாக, வார்டு கவுன்சிலர்கள் மூலம் தேர்ந்தெடுக்கும் மறைமுக தேர்தல் நடைமுறை கொண்டு வரப்பட உள்ளது. இதற்கான அவசர சட்டம் இயற்றுவது தொடர்பாக அமைச்சரவையில் ஆலோசிக்கப்பட்டதாக தகவல்கள் தெரிவிக்கின்றன.

கடந்த 1996 -ஆம் ஆண்டு முதல், மாநகராட்சி மேயர் பதவிக்கு நேரடி தேர்தல் நடத்தப்பட்டு வந்தது. இந்த நிலையில், 2006-இல், அதிமுக ஆட்சி நிறைவடைய இருந்த தருணத்தில், மேயர் பதவிக்கான நேரடி தேர்தல் முறை ரத்து செய்யப்பட்டது.

2011- இல் இந்தப் பதவிக்கு மீண்டும் நேரடி தேர்தல் முறை அமல்படுத்தப்பட்டது. ஆனால், சொல்லி வைத்தாற்போல, 2016-இல் மேயர் பதவிக்கு நேரடியாக தேர்தல் நடத்தும் நடைமுறையை ரத்து செய்வதற்கான சட்ட மசோதா அறிமுகப்படுத்தப்பட்டது. ஆனால், பல்வேறு காரணங்களால் அப்போது உள்ளாட்சித் தேர்தல் நடத்தப்படவில்லை.

இத்தகைய சூழலில், சென்னையில் இன்று நடைபெற்ற அமைச்சரவைக் கூட்டத்தில் இப்படியொரு முடிவு எடுக்கப்பட்டுள்ளதாக தகவல் வெளியாகியுள்ளது.
உள்ளாட்சி அமைப்புகளிலேயே மிக உயர்ந்ததாக மேயர் பதவி கருதப்படுகிறது. இந்தப் பதவிக்கு நேரடி தேர்தல் முறை ரத்து செய்யப்படாது என தமிழக முதல்வர் எடப்பாடி பழனிசாமி அண்மையில் தெரிவித்திருந்தார். இந்த நடைமுறையை மாற்றக் கூடாது என திமுகவும் வலியுறுத்தி வந்தது குறிப்பிடத்தக்கது. தமிழகத்தில் தற்போது சென்னை, கோவை, மதுரை உள்ளிட்ட 15 மாநகராட்சிகளும், 123 நகராட்சிகளும் உள்ளன என்பது குறிப்பிடத்தக்கது.

Leave a Reply

Your email address will not be published. Required fields are marked *