அயோத்தி தீர்ப்பு அரசியல் தலையீட்டின் வெளிப்பாடு-திருமா

சென்னை, நவம்பர்-09

அயோத்தி தீர்ப்பு அரசியல் தலையீட்டின் வெளிப்பாடு என விடுதலை சிறுத்தைகள் கட்சியின் தலைவர் தொல்.திருமாவளவன் கூறியுள்ளார்.

அயோத்தியிலுள்ள 2.77 ஏக்கா் சா்ச்சைக்குரிய நிலத்தில் ராமர் கோவில் கட்டலாம் என்று தலைமை நீதிபதி ரஞ்சன் கோகோய் தலைமையிலான ஐந்து நீதிபதிகள் கொண்ட உச்சநீதிமன்ற அரசியல் சாசன அமா்வு தீர்ப்பு வழங்கியுள்ளது. இவ்வழக்கில் ஐந்து நீதிபதிகளும் ஒருமித்த தீர்ப்பை வழங்கியுள்ளனர். 

சர்ச்சைக்குரிய நிலத்தில் ராமர் கோவில் கட்டலாம் என்றும் அதே நேரத்தில் இஸ்லாமியர்களுக்கு மசூதி கட்டுவதற்கு 5 ஏக்கர் மாற்று நிலம் வழங்கப்படும் என்றும் உச்ச நீதிமன்றத் தீர்ப்பில் குறிப்பிடப்பட்டுள்ளது.

இந்நிலையில், அயோத்தி தீர்ப்பு குறித்து விடுதலை சிறுத்தைகள் கட்சியின் தலைவர் தொல்.திருமாவளவன் வெளியிட்டுள்ள அறிக்கையில், “பாபர் மசூதி இடிப்பு வழக்கில் அளிக்கப்பட்ட உச்சநீதிமன்றத் தீர்ப்பு சட்டத்தின் அடிப்படையிலோ, ஆதாரங்களின் அடிப்படையியோ அளிக்கப்பட்டதாக தெரியவில்லை. சட்டம் ஒழுங்கையும், சமூக நல்லிணக்கத்தையும் கருத்தில் கொண்டு சமரச தீர்ப்பாக வழங்கப்பட்டிருக்கிறது. முஸ்லிம்களுக்கு 5 ஏக்கர் மாற்று நிலம் எனத் தீர்ப்பில் தெரிவிக்கப்பட்டுள்ளது. இது நீதியை நிலைநாட்டுவதாக இல்லை. சமரச முயற்சியாகவே இருக்கிறது.

ராமர் கோயிலைக் கட்ட மூன்று மாதங்களுக்குள் மத்திய அரசு அறக்கட்டளை நிறுவ வேண்டும் என்று கூறிய நீதிமன்றம் பாபர் மசூதிக்கு நிலம் ஒதுக்கவும் அதைக் கட்டமைக்கவும் ஏன் அறக்கட்டளை நிறுவ உத்தரவிட்டிருக்கூடாது?

முஸ்லிம்கள் ஆவணங்கள் உரிய அளவில் ஒப்படைக்கவில்லை என்றால் இந்துக்கள் ஒப்படைத்த உரிய ஆவணங்கள் என்னென்ன? சாஸ்திரங்கள் அடிப்படையில் ஒரு சாரரின் நம்பிக்கையை மட்டுமே ஆதாரமாக வைத்து மொத்த இடத்தையும் இந்துக்களுக்கே வழங்கியிருப்பது அரசியல் தலையீட்டின் வெளிப்பாடாகவேத் தெரிகிறது” எனத் விடுதலை சிறுத்தைகள் கட்சி தலைவர் தொல். திருமாவளவன் தெரிவித்துள்ளார்.

Leave a Reply

Your email address will not be published. Required fields are marked *