வெளிநாடுகளிலிருந்து வெங்காயம் இறக்குமதி செய்ய முடிவு

புதுடெல்லி, நவம்பர்-06

வெங்காய தட்டுப்பாடு மற்றும் விலையேற்றத்தை கட்டுப்படுத்த, எகிப்து, துருக்கி, ஈரான் ஆகிய நாடுகளிலிருந்து, வெங்காயத்தை இறக்குமதி செய்ய மத்திய அரசு முடிவு செய்துள்ளது.

மழை உள்ளிட்ட காரணிகளால், வெங்காய சாகுபடி பாதிக்கப்பட்டு, விளைச்சல் குறைந்திருக்கிறது. இதனை பயன்படுத்தி, இடைத்தரகர்கள் சிலர், வெங்காயத்தை பதுக்கி வைத்து, அதன் விலையை உயர்த்திவிட்டிருப்பதாகவும் கூறப்படுகிறது.

இதனால், வெங்காயத்திற்கு தட்டுப்பாடு ஏற்பட்டு, அதன் விற்பனை விலை, ஒரு கிலோ 100 ரூபாய் வரையில் உயர்ந்திருக்கிறது. இதையடுத்து, வெங்காயத்தின் விலையை கட்டுப்படுத்தும் நடவடிக்கைகளில், மத்திய, மாநில அரசுகள் தீவிரம் காட்டி வருகின்றன.

இந்த வகையில், அதிகரித்து வரும் வெங்காயத்தின் விலையை கட்டுப்படுத்தும் விதமாக, எகிப்து, துருக்கி, ஈரான் ஆகிய நாடுகளில் இருந்து, வெங்காயத்தை அதிகளவில் இறக்குமதி செய்ய மத்திய அரசு முடிவு செய்துள்ளது.

இதற்காக, அமைச்சக அளவில் ஒப்புதல் பெறப்பட்டு, விரைவாக வெங்காயம் இறக்குமதி செய்யப்பட்டு, விற்பனைக்கு கொண்டுவரப்படும் என மத்திய அரசின், நுகர்வோர் விவகாரத்துறை அமைச்சகம் தெரிவித்திருக்கிறது.

Leave a Reply

Your email address will not be published. Required fields are marked *