தமிழக சட்டப்பேரவைத் தேர்தலுக்கான வேட்பு மனுத்தாக்கல் நிறைவு.. வரும் 22ம் தேதி இறுதி வேட்பாளர் பட்டியல்

தமிழக சட்டப்பேரவை தேர்தலில் போட்டியிட 4500க்கும் மேற்பட்டோர் வேட்புமனு தாக்கல் செய்துள்ளனர்.

சென்னை, மார்ச்-20

தமிழக சட்டப்பேரவைக்கான தேர்தல் ஏப்ரல் 6 ஆம் தேதி நடைபெறவுள்ளது. இதற்காக கடந்த மார்ச் 12 ஆம் தேதி முதல் வேட்புமனு தாக்கல் நடைபெற்று வந்தது. இந்நிலையில், தமிழக சட்டபேரவைத் தேர்தலுக்கான வேட்புமனு தாக்கல் நேற்று (மார்ச்-19) மாலை 3 மணியுடன் நிறைவடைந்தது. மனுதாக்கல் செய்யும் கடைசிநாளான நேற்று சுயேச்சையாக போட்டியிட அதிகமானோர் மனுதாக்கல் செய்துள்ளனர்.

தேர்தல் ஆணைய இணையத்தளத்தில் அதிகாலை 6 மணி வரை பதிவேற்றப்பட்ட விவரங்களின் படி, தமிழகம் முழுவதும் 7 ஆயிரத்து 81 மனுக்கள் அளிக்கப்பட்டுள்ளன. இவர்களில் 6 ஆயிரத்து 34 பேர் ஆண்கள், ஆயிரத்து 44 பேர் பெண்கள் ஆவர். மயிலாப்பூரில் ஒருவர், மதுரை தெற்கில் இருவர் என மூன்றாம் பாலினத்தவர் 3 பேர் வேட்பு மனு அளித்துள்ளனர்.

அதிகபட்சமாக கரூர் தொகுதியில் 97 வேட்பு மனுக்கள் தாக்கல் செய்யப்பட்டுள்ளன. குறைந்தபட்சமாக வானூர், குன்னூர், திருச்சி மேற்கு, பவானி சாகர் ஆகிய தொகுதிகளில் தலா 13 மனுக்கள் தாக்கல் செய்யப்பட்டிருக்கின்றன. முதல்வர் பழனிசாமி போட்டியிடும் எடப்பாடியில் 48, துணை முதல்வர் ஓ.பன்னீர்செல்வம் போட்டியிடும் போடிநாயக்கனூரில் 51 என வேட்புமனுக்கள் பெறப்பட்டுள்ளன. திமுக தலைவர் மு.க.ஸ்டாலின் களத்தில் இருக்கும் கொளத்தூரில் 55 மனுக்களும், டிடிவி தினகரன் களமிறங்கியுள்ள கோவில்பட்டியில் 44 வேட்பு மனுகள் அளிக்கப்பட்டுள்ளன.

கமல்ஹாசன் களத்தில் உள்ள கோவை தெற்குத் தொகுதியில் 33 மனுக்களும், சீமான் போட்டியிடும் திருவொற்றியூரில் 32 வேட்பு மனுக்களும் தாக்கல் செய்யப்பட்டுள்ளன. வேட்பு மனுக்கள் மீது இன்று பரிசீலனை நடைபெறுகிறது. நாளை மறுநாள் பிற்பகல் 3 மணிக்குள் வேட்பு மனுக்களை வாபஸ் பெறலாம். அன்றைய தினம் மாலை 5 மணிக்குள் இறுதி வேட்பாளர் பட்டியல் வெளியிடப்படும். ஏப்ரல் 6 ஆம் தேதி தேர்தல் நடைபெறுகிறது. மே 2 ஆம் தேதி தேர்தல் முடிவுகள் வெளியிடப்படுகின்றன.

கன்னியாகுமரி மக்களவை இடைத்தேர்தல் மற்றும் புதுச்சேரி சட்டமன்ற தேர்தலுக்கான வேட்புமனு தாக்கலும் நிறைவடைந்தது.

Leave a Reply

Your email address will not be published. Required fields are marked *