விவசாய கடன் தள்ளுபடி என அறிவித்தது தேர்தல் நாடகம் – கே.எஸ்.அழகிரி

விவசாய கடன் தள்ளுபடி என்பது தேர்தலுக்கான நாடகம் என தமிழ்நாடு காங்கிரஸ் தலைவர் கே.எஸ்.அழகிரி குற்றம்சாட்டியுள்ளார்.

சென்னை, பிப்-9

தமிழ்நாடு காங்கிரஸ் சார்பில் சமூக ஊடகங்கள் மூலம் பிரசாரம் செய்யும் நிகழ்ச்சி சத்தியமூர்த்தி பவனில் இன்று தொடங்கப்பட்டது. தமிழ்நாடு காங்கிரஸ் தலைவர் கே.எஸ்.அழகிரி இதை தொடங்கி வைத்தார். பின்னர் அவர் நிருபர்களிடம் கூறியதாவது:-

மத்தியில் மோடி அரசும், மாநிலத்தில் அ.இ.அ.தி.மு.க. அரசும் சேர்ந்து, நாட்டையும், மாநிலத்தையும் பொருளாதாரம், வேலைவாய்ப்பு, பெண்களுக்கான மேம்பாடு என ஒவ்வொரு துறையிலும் ஏற்படுத்திய அழிவை வலியுறுத்த வேண்டும்.

« சமூக ஊடகங்களில் அரசுக்கு எதிராக அதிகரித்து வரும் கோபத்தை நாம் காண்கிறோம். அது குறித்துக் குறிப்பிட வேண்டும். ஏராளமான மக்கள், இளைஞர்கள், பெண்கள், மாணவர்கள் உள்ளிட்ட பலரும் அரசுக்கு எதிராகக் குரல் கொடுப்பதைப் பார்க்கிறோம். ஆனால், மோடி அரசோ இந்த குரல்களை ஒடுக்கும் நடவடிக்கையில் இறங்கியுள்ளது. இந்த சூழலில், குரலற்றவர்களின் குரலாகக் காங்கிரஸின் குரல் ஒலிக்கும்.

« பா.ஜ.க.வும் மற்றும் பிற கட்சிகளும் ஊடகங்களை முழுமையாக தங்கள் கட்டுப்பாட்டில் வைத்திருப்பதையும், அதன்மூலம் இட்டுக்கட்டும் செய்திகள், மக்களைத் திசை திருப்பும் பொய் செய்திகள் மற்றும் போலிச் செய்திகளை வெளியிடுவதைப் பற்றிப் பேச வேண்டும். சமீபத்தில் விவசாயிகள் போராட்டம் பற்றி தவறான தகவலை சமூக ஊடகங்களில் பதிவிட்டதாக 1178 டிவிட்டர் கணக்குகளை நீக்க மத்திய அரசு உத்தரவிட்டிருக்கிறது. அதே நேரத்தில் சமூக நல்லிணக்கத்தை சீர்குலைக்கிற வகையில் சமூக ஊடகங்களில் பதிவிடுகிற ஆர்.எஸ்.எஸ்., பா.ஜ.க., வகுப்புவாத இயக்கத்தினர் மீது எந்த நடவடிக்கையையும் பா.ஜ.க. அரசு எடுப்பதில்லை. இது பா.ஜ.க. அரசின் பாரபட்ச போக்கையே காட்டுகிறது.

« இந்த சர்வாதிகார மற்றும் பாசிச அரசாங்கத்தை எதிர்த்துப் போராடுவதற்கான ஒரே வழி, நாம் ஒன்றாக இணைந்து, ஒரே குரலாக ஒலிப்பதுதான்.

« ஒரே குரலாக இணைந்து ஒலிக்க வேண்டியதன் முக்கியத்துவத்தை நாம் புரிந்து கொள்ள வேண்டும். நாடு முழுவதும் சிதறி ஒலித்துக் கொண்டிருக்கும் காங்கிரஸ் அனுதாபிகளின் குரல்களை ஒரே குடையின் கீழ் ஒழுங்குபடுத்த வேண்டும். இதனை மனதில் வைத்தே, ‘காங்கிரஸ் சமூக ஊடகத்தில் இணையுங்கள்’ என்ற பிரச்சாரத்தைக் காங்கிரஸ் சமூக ஊடகத் துறை தொடங்கியுள்ளது.

« ஜனநாயகம், மதச்சார்பின்மை, சமத்துவம் மற்றும் சுதந்திரத்தைப் பாதுகாக்கப் போராட விரும்புவோரை, காங்கிரஸ் சமூக ஊடகத்தில் இணையுங்கள் என்ற பிரச்சார இயக்கத்தில் சேர நாம் வரவேற்கிறோம். இதில் சேர்ந்து இந்தியாவின் உண்மையான கொள்கைகளைப் பாதுகாக்கப் போராடுங்கள். காந்தியடிகள், நேரு, சர்தார் பட்டேல், மற்றும் சுதந்திரத்துக்காகப் போராடிய நமது அனைத்து தலைவர்கள் மற்றும் முன்னோடிகளைக் கொண்டது தான் இந்தியா.

« இந்த பிரச்சாரம் வழியாக, 5 லட்சம் காங்கிரஸ் சமூக ஊடகப் போராளிகளை நாம் ஒன்றிணைக்க முடியும். இதில் 50 ஆயிரம் பேர் தேசிய, மாநில மற்றும் மாவட்ட அளவிலான நிர்வாகிகளாக இருப்பார்கள். அவர்களது விருப்பத்தின் அடிப்படையில் பணியைத் தேர்வு செய்யலாம். விழிப்புணர்வு, உறுப்பினர் சேர்ப்புப் பிரச்சாரம், நேர்காணல்கள், தேர்வு, பயிற்சி மற்றும் நியமனம் என ஒரு மாத காலத்துக்கு நாம் பணியாற்ற வேண்டும்.

« மக்கள் இணையும் வகையில், மிஸ்டு கால் எண், வாட்ஸ்அப் எண், இணையம் மற்றும் இமெயில் முகவரி வழியிலான பிரச்சாரத்தை நாம் தொடங்குவோம்.

« ப்ளே வீடியோ (பிரச்சார லோகோ தொடக்கம் 10 இலவச தொலைபேசி அழைப்பு எண்)

« இந்த பிரச்சாரத்தில் இணையுமாறு, திரு. ராகுல் காந்தி அவர்கள் விடுக்கும் அழைப்பை இந்த வீடியோவில் (ப்ளே வீடியோ) இடம்பெறச் செய்வோம்.

(1) ‘குறைந்தபட்ச ஆதரவு விலை தொடரும், போராட்டத்தை கைவிடுங்கள்’ என்று பிரதமர் மோடி விவசாயிகளுக்கு வேண்டுகோள் விடுத்திருக்கிறார். மேலும், வேளாண் சட்டங்களை விவசாயிகள் ஏற்றுக் கொள்ள வேண்டுமென்றும் வலியுறுத்தியிருக்கிறார்.

கடந்த 72 நாட்களாக கடும் குளிரையும் பொருட்படுத்தாமல் போராடி 200-க்கும் மேற்பட்டவர்கள் உயிரிழந்திருக்கிறார்கள். சிலர் தற்கொலை செய்து கொண்டிருக்கிறார்கள். இதற்கு பிறகும், மூன்று வேளாண் சட்டங்களை திரும்பப் பெற மறுக்கும் சர்வாதிகாரியாக மோடி செயல்படுவதையே அவரது அறிவிப்பு காட்டுகிறது.

குறைந்தபட்ச ஆதரவு விலை தொடரும் என்று கூறுகிற பிரதமர் மோடி, அதற்கான சட்ட பாதுகாப்பை வழங்க மறுப்பது ஏன் ? விவசாயிகளின் விளை பொருட்களை கொள்முதல் செய்கிற ஏகபோக உரிமையை அம்பானி, அதானி உள்ளிட்ட கார்ப்பரேட் நிறுவனங்களுக்கு தாரை வார்த்த பிறகு, குறைந்தபட்ச ஆதரவு விலைக்கு பிரதமர் மோடியால் சட்டப் பாதுகாப்பு வழங்க முடியாது. இதனால்தான் மோடி அரசு, விவசாய விரோத அரசு என்று குற்றம் சாட்டுகிறோம்.

(2) கூட்டுறவு வங்கிகளில் வாங்கிய விவசாய கடனை முதலமைச்சர் எடப்பாடி தள்ளுபடி செய்திருக்கிறார். அ.தி.மு.க. ஆட்சி அமைந்து 10 ஆண்டுகள் நெருங்கிய நிலையில் தேர்தலை சந்திக்கும் இந்த வேளையில் ரூபாய் 12 ஆயிரம் கோடி கடனைத் தள்ளுபடி செய்திருக்கிறார். இதற்கான முழு நிதியை பிப்ரவரி இறுதியில் பட்ஜெட்; தாக்கலின் போது ஒதுக்குகிறார்களா என்பது தெரியவில்லை. ஏற்கனவே, ரூபாய் 5 லட்சம் கோடி கடனில் திவாலான நிலையில் இருக்கிற தமிழக அரசு ஆட்சியை விட்டு அகலுகிற இரண்டு மாதங்களுக்கு முன்பாக தேர்தல் ஸ்டன்ட்டாக கடன் ரத்து அறிவிப்பை செய்திருக்கிறது. இதுவொரு கண்துடைப்பு நாடகம். உண்மையிலேயே விவசாய கடனை ரத்து செய்ய வேண்டுமென்பதில் எடப்பாடிக்கு அக்கறை இருந்திருந்தால் அவர் முதலமைச்சர் ஆனதும் செய்திருக்க வேண்டும்.

கூட்டுறவு வங்கிகளில் வாங்கிய கடனை ரத்து செய்த அ.தி.மு.க. அரசு, மத்திய பா.ஜ.க. அரசை வலியுறுத்தி, தேசியமயமாக்கப்பட்ட வங்கிகளில் விவசாயிகள் வாங்கிய கடனையும் ரத்து செய்தால் தான் விவசாயிகளுக்கு முழுமையான பயன் கிடைக்கும்.

(3) தமிழகத்;தில் நடைமுறையில் உள்ள 69 சதவிகித இடஒதுக்கீட்டை எதிர்த்து உச்சநீதிமன்றத்தில் வழக்கு தொடுக்கப்பட்டிருக்கிறது. தமிழகத்தில் கல்வி மற்றும் வேலை வாய்பில் பின்தங்கியவர்களுக்கு வழங்கப்படுகிற 69 சதவிகித இடஒதுக்கீடு அரசமைப்பு சட்டத்தின் 9 ஆவது அட்டவனையில் சேர்க்கப்பட்டுள்ளது. இதுவரை தமிழகம் அனுபவித்து வருகிற 69 சதவிகிதத்தை பாதுகாக்கிற அனைத்து நடவடிக்கைகளையும் தமிழக அரசு எடுக்க வேண்டும். ஆனால், மத்திய பா.ஜ.க. அரசு இடஒதுக்கீட்டிற்கு எதிராக சமூக நீதியை சீர்குலைக்கிற வகையில் நடவடிக்கை எடுத்து வருகிறது. இந்தப் பின்னணியில் பா.ஜ.க.வின் இடஒதுக்கீட்டிற்கு எதிhரன நடவடிக்கைகளை தடுத்து நிறுத்துகிற வகையில் அ.தி.மு.க. அரசு செயல்படவில்லையெனில் அதற்கான விளைவுகளை சந்திக்க வேண்டி வரும்.

(4) தமிழக முதலமைச்சர் எடப்பாடி பழனிச்சாமி மீது சி.பி.ஐ. விசாரணைக்கு உச்சநீதிமன்றம் தடை விதித்து இரண்டாண்டுகளுக்கு மேலாகியுள்ளது. இந்த தடையை நீக்குவதற்கு பா.ஜ.க. அரசு தயாராக இல்லை. இதன்மூலம் எடப்பாடி அரசு பா.ஜ.க.வின் கைப்பிடிக்குள் இருக்கிறது. இந்நிலையில், உச்சநீதிமன்றத்தில் இடைக்கால தடையாணை நீக்கப்பட்டால் எடப்பாடி முதலமைச்சராக நீடிக்க முடியாது. இந்த சூழலை பயன்படுத்தி அ.தி.மு.க.வோடு, பா.ஜ.க. அரசியல் பேரம் பேசி வருகிறது. இதனைக் கண்டிக்கிற வகையில், உச்சநீதிமன்றத்தில் இரண்டு ஆண்டுகளாக நீடிக்கிற தடையாணையை நீக்குகிற நடவடிக்கைகளை எடுக்கத் தவறிய மத்திய புலனாய்வுத்துறையின் சென்னை அலுவலகத்தை தமிழ்நாடு காங்கிரஸ் சார்பில் முற்றுகையிடுகிற போராட்டம் பிப்ரவரி மாத இறுதியில் நடத்தப்படும் என்பதை தெரிவித்துக் கொள்கிறேன்.

(5) சமீபத்தில் இலங்கை அரசு இந்தியாவோடு செய்திருந்த கிழக்கு கொள்கலன் முனைய ஒப்பந்தத்தை ரத்து செய்துவிட்டது. இதைத் தொடர்ந்து 2019 இல் சீன அரசோடு செய்து கொண்ட கொழும்பு துறைமுக முனையத்தை அறிவித்ததோடு, தற்போது சீன அரசோடு மின் உற்பத்திக்கான திட்டத்தை தமிழகத்திற்கு மிக அருகாமையில் உள்ள மூன்று தீவுகளில் தொடங்க ஒப்பந்தம் போட்டுள்ளது. இது தமிழகத்தில் இருந்து 50 கி.மீ. தூரத்தில் உள்ளது. இதனால் இந்தியாவின் பாதுகாப்பிற்கு அச்சுறுத்தல் ஏற்படுவதோடு, தமிழகத்திற்கு மிகப்பெரிய அளவில் பாதிப்பு ஏற்படுகிற சூழல் ஏற்பட்டுள்ளது. இதுகுறித்து இதுவரை மத்திய பா.ஜ.க. அரசு எந்த கருத்தையும் தெரிவிக்காமல் இருப்பது மிகுந்த கவலையை தருகிறது.

எனவே, அண்டை நாடான இலங்கையில் சீனாவின் ஆதிக்கம் அதிகரித்து வருவது இந்தியாவின் பாதுகாப்பிற்கு மிகப்பெரிய அச்சுறுத்தலாகும். இதுகுறித்து பிரதமர் மோடி தீவிர கவனம் செலுத்த வேண்டும்.

இவ்வாறு அவர் கூறினார்.

Leave a Reply

Your email address will not be published. Required fields are marked *