காற்றழத்த தாழ்வால் கனமழை பெய்யும் : வானிலை மையம்

சென்னை.அக்டோபர்.29

   இலங்கை அருகே குமரி கடல் பகுதியில் நிலவும் காற்றழுத்த தாழ்வு காரணமாக தமிழகத்தில் கனமழை பெய்யும் என சென்னை வானிலை ஆய்வு மையம் தெரிவித்துள்ளது.

இதுகுறித்து சென்னை வானிலை ஆய்வு மையத்தின் தென்மண்டல தலைவர் பாலச்சந்திரன்  கூறுகையில்,  இலங்கையை ஒட்டி நிலவி வந்த குறைந்த காற்றழுத்த தாழ்வு பகுதி, தற்போது குமரிக் கடல் பகுதியில் நகர்ந்து வலுவான குறைந்த காற்றழுத்த தாழ்வு பகுதியாக நிலவுகிறது.
அடுத்து வரும் 24 மணி நேரத்தில் லட்சத்தீவு பகுதியில் காற்றழுத்த தாழ்வு மண்டலமாகவும், அதற்கடுத்து வரும் 24 மணி நேரத்தில் ஆழ்ந்த காற்றழுத்த தாழ்வு மண்டலமாகவும் வலுப்பெறக் கூடும்.

கடந்த 24 மணி நேரத்தில் தமிழகம் மற்றும் புதுவையில் மிதமான மழை பெய்துள்ளது. ஓரிரு இடங்களில் கனமழை பெய்துள்ளது. அதிகபட்சமாக திருவாரூரில் 7 செ.மீ, மகாபலிபுரத்தில் 6 செ.மீ மழையும் பதிவாகி உள்ளது.

அடுத்து வரும் 24 மணி நேரத்தை பொறுத்தவரை தென் தமிழகத்தில் பெரும்பாலான இடங்களில் வட தமிழகத்தின் அநேக இடங்களிலும் மிதமான மழை பெய்யக் கூடும்.
தென் தமிழக மாவட்டங்களான குமரி, நெல்லை, தூத்துக்குடி, ராமநாதபுரம், விருதுநகர், மதுரை, சிவகங்கை, புதுக்கோட்டை ஆகியவற்றில் சில இடங்களில் கனமழை பெய்யக்கூடும்.
வடதமிழக மாவட்டங்களில் கடலூர், விழுப்புரம், காஞ்சிபுரம், திருவண்ணாமலை, வேலூர், திருவள்ளூர், கிருஷ்ணகிரி, தருமபுரி ஆகியவற்றில் ஓரிரு இடங்களில் கனமழைக்கு வாய்ப்புள்ளது.
மன்னார் வளைகுடா, தென் தமிழக கடற்பகுதிகள், குமரிக் கடல் பகுதி, மாலத்தீவு, தெற்கு கேரள பகுதி, லட்சத்தீவு பகுதிகளுக்கு 29, 30, 31 ஆகிய தேதிகளில் கடலுக்கு மீனவர்கள் செல்ல வேண்டாம் என்று அறிவுறுத்தப்படுகிறது.

சென்னை மற்றும் புறநகரைப் பொறுத்தவரை நகரில் சில இடங்களில் லேசானது முதல் மிதமானது வரை மழைக்கு வாய்ப்புள்ளது என்று தெரிவித்தார்.

Leave a Reply

Your email address will not be published. Required fields are marked *