அடுத்த முதல்வர் எடப்பாடி பழனிசாமிதான்…அமைச்சர் திண்டுக்கல் சீனிவாசன் பேச்சால் பரபரப்பு..!

அடுத்த முதல்வர் எடப்பாடி பழனிசாமிதான் என அமைச்சர் திண்டுக்கல் சீனிவாசன் தெரிவித்துள்ளார். வேலை காரணமாக முதல்வர் நடத்திய கூட்டத்துக்கு ஓபிஎஸ் வரவில்லை. அதிமுகவில் முதல்வர் வேட்பாளர் என்ற போட்டி இல்லை. அதிமுகவின் முதல்வர் வேட்பாளர் குறித்து வரும் 7ஆம் தேதி அறிவிக்கப்படும் எனவும் கூறினார்.

சென்னை, செப்-30

2021 சட்டப்பேரவைத் தேர்தலில் முதல்வர் வேட்பாளர் யார் என்பது குறித்து அதிமுகவில் கடந்த சில மாதங்களாகவே சர்ச்சை நீடித்து வருகிறது. சில தினங்களுக்கு முன் நடைபெற்ற அக்கட்சியின் செயற்குழுக் கூட்டத்தில் இந்த சர்ச்சை பகிரங்கமாக வெடித்தது.
முதல்வர் வேட்பாளர் யார் என்பது தொடர்பாக முதல்வர் எடப்பாடி பழனிசாமியும், துணை முதல்வர் ஓ.பன்னீர்செல்வமும் செயற்குழுவில் வெளிப்படையாக வாக்குவாதத்தில் ஈடுபட்டனர்.

இந்தச் சம்பவம் தமிழக அரசியல் களத்தில் பெரும் பரபரப்பை ஏற்படுத்தியுள்ள நிலையில், கொரோனா பொதுமுடக்கத்தை நீட்டிப்பது தொடர்பாக மாவட்ட ஆட்சியர்கள், மருத்துவ நிபுணர்களுடன் நேற்று (செப்.29) முதல்வர் மேற்கொண்ட ஆலோசனையில், துணை முதல்வர் ஓ.பன்னீர்செல்வம் பங்கேற்கவில்லை. இந்த ஆலோசனைக் கூட்டத்தை புறக்கணித்துவிட்டு, வழக்கத்துக்கு மாறாக தமது ஆதரவாளர்களுடன் அவர் ஆலோசனை மேற்கொண்டார். ஓபிஎஸ் இந்த நடவடிக்க தமிழக அரசியலில் மேலும் பரபரப்பை ஏற்படுத்தியுள்ளது.

இந்த நிலையில், அதிமுகவில் நிலவிவரும் முதல்வர் வேட்பாளர் சர்ச்சை குறித்து, அமைச்சர் திண்டுக்கல் சீனிவாசன் செய்தியாளர்களிடம் இன்று கூறும்போது, “அதிமுகவை பொறுத்தவரை முதல்வர் வேட்பாளர் யார் என்பதில் போட்டி, பிரச்சினை இல்லை. இபிஎஸ்- ஓபிஎஸ் ஆகியோர் இணைந்து, முதல்வர் வேட்பாளர் யார் என்பது குறித்து அக்டோபர் 7 ஆம் தேதி அறிவிப்பார்கள். மக்களின் பிரச்சினைகள் அனைத்தும் தற்போது தீர்க்கப்பட்டு வருகின்றன. எனவே தமிழகத்தில் அடுத்தும் அதிமுக ஆட்சி தான். எடப்பாடி பழனிசாமி தான் மீண்டும் முதல்வர்” என்று அமைச்சர் திண்டுக்கல் சீனிவாசன் தெரிவித்துள்ளார்.

அமைச்சரின் இந்த வெளிப்படையான கருத்து, அதிமுகவில் சலசலப்பை ஏற்படுத்தியுள்ளது.

Leave a Reply

Your email address will not be published. Required fields are marked *