தமிழகத்தில் இ-பாஸ் நடைமுறை தொடரும்.. தலைமை செயலாளர் சண்முகம் பதில்

தமிழகத்தில் மாவட்டம் விட்டு மாவட்டம் செல்ல கட்டுப்பாடுகள் இருக்கும் வரை இ-பாஸ் நடைமுறை தொடரும் தலைமைச் செயலாளர் சண்முகம் தகவல் தெரிவித்துள்ளார்.

சென்னை, ஆகஸ்ட்-13

இ-பாஸ் நடைமுறை எப்போது முடிவுக்கு வரும் என்பது தான் தமிழக மக்களின் மிகப்பெரிய எதிர்பார்ப்பாக உள்ளது. மத்திய அரசே இ-பாஸ் நடைமுறையை வேண்டாம் என்று சொல்லிவிட்ட நிலையில் தமிழக அரசு அதைகைவிட மறுப்பதற்கு திமுக, உள்ளிட்ட எதிர்க்கட்சிகள் கடும் எதிர்ப்பு தெரிவித்து வருகின்றன.

இந்நிலையில், சென்னையை அடுத்த மறைமலை நகரில் கொரோனா தடுப்பு நடவடிக்கைகள் குறித்து தலைமைச் செயலாளர் கே.சண்முகம் தலைமையில் ஆய்வுக்கூட்டம் மறைமலைநகரில் நேற்று நடந்தது. இதில், சுகாதாரத் துறை செயலாளர் ராதாகிருஷ்ணன் உள்ளிட்ட முக்கிய அதிகாரிகள் கலந்துகொண்டனர்.

பின்னர், செய்தியாளர்களுக்கு பேட்டியளித்த தலைமைச் செயலாளர் சண்முகம் கூறியதாவது ;-

கொரோனா தொற்றை கட்டுப்படுத்த செங்கல்பட்டு மாவட்ட நிர்வாகம் சிறப்பாக நடவடிக்கைகளை மேற்கொண்டு வருகிறது. அதிகம் பாதிப்புள்ள பகுதிகளில் குழுக்கள் அமைத்து ஆய்வு மேற்கொள்ள அறிவுறுத்தியுள்ளோம். பொதுமக்கள் மத்தியில் மாஸ்க் அணிவது மற்றும் சமூக இடைவெளியைக் கடைப்பிடிப்பது ஆகியவற்றில் குறைபாடு இருக்கும் காரணத்தினால், இதுகுறித்து விழிப்புணர்வு ஏற்படுத்தவும், வீடுகளுக்கே சென்று அரசால் வழங்கப்படும் மாஸ்க் கொடுக்க வேண்டும். மேலும், கொரோனா தொற்று அதிகமுள்ள பகுதிகளில் தடுப்புப் பணிகளைக் கண்காணிக்கக் குழுக்கள் அமைக்கப்படும். கொரோனா தொற்று ஏற்பட்ட நபர்களிடம் தொடர்பில் இருந்த நபர்களைத் தீவிரமாகக் கண்டறிந்து அவர்களைத் தனிமைப்படுத்த நடவடிக்கை எடுக்கப்படும். நோய்த் தொற்று அதிகமாக உள்ள பகுதிகளில் மாநில அளவில் சிறப்புக் குழுக்களை அனுப்புவதற்கு முடிவு செய்யப்பட்டுள்ளது.

இவ்வாறு அவர் கூறினார்.

மேலும், இ-பாஸ் பெறுவதில் இருக்கும் நடைமுறை சிக்கல்களைக் களைய நடவடிக்கை எடுத்து வருகிறோம் என்று தெரிவித்த அவர், மாவட்டம் விட்டு மாவட்டம் செல்ல கட்டுப்பாடுகள் இருக்கும் வரை இ-பாஸ் நடைமுறை தொடரும். அதில் தளர்வுகள் இருக்காது என்றார்.

Leave a Reply

Your email address will not be published. Required fields are marked *