கொரோனாவால் தமிழக மருத்துவர்கள் எத்தனை பேர் இறந்தார்கள் என்பதை அமைச்சர் அறிவிப்பாரா?.. மு.க. ஸ்டாலின் கேள்வி

இந்தியா முழுவதும் கொரோனா தொற்றால் 196 மருத்துவர்கள் இறந்துள்ள நிலையில், தமிழகத்தைச் சேர்ந்த டாக்டர்கள் எத்தனை பேர் என்பதை சுகாதாரத்துறை அமைச்சர் விஜயபாஸ்கர் அறிவிப்பாரா? என்று திமுக தலைவர் முக ஸ்டாலின் கேள்வி எழுப்பியுள்ளார்.

சென்னை, ஆகஸ்ட்-8

இது தொடர்பாக திமுக தலைவர் மு.க.ஸ்டாலின் வெளியிட்டுள்ள அறிக்கையில்; கொரோனா காலத்தில் தினமும் பல மருத்துவர்கள் உயிரிழந்து வரும் செய்தி அதிர்ச்சி அளிக்கிறது. இதுவரை இந்தியாவில் மரணம் அடைந்த மருத்துவர்கள் 175 பேர் என்றும் அதில் தமிழகத்தைச் சேர்ந்தவர் 43 பேர் என்றும் செய்தி வந்தது. அதனை மக்கள் நல்வாழ்வுத்துறை அமைச்சர் விஜயபாஸ்கர் மறுத்தார். இந்தியா முழுவதும் இது வரை 196 மருத்துவர்கள் இறந்துள்ளதாக இன்று ஐ.எம்.ஏ தகவல் தந்துள்ளது. இவர்களில் எத்தனை பேர் தமிழக மருத்துவர்கள் என்பதை அமைச்சர் அறிவிப்பாரா? மரணங்களைத் தடுக்கும் வழி என்பது மரணங்களை மறைப்பது அல்ல. என கூறியுள்ளார்.