சாத்தான்குளம் வழக்கில் தேடப்பட்ட காவலர் முத்துராஜ் கைது

தந்தை மகன் மரணம் தொடர்பான வழக்கில் தலைமறைவாக இருந்த காவலர் முத்துராஜை போலீசார் கைது செய்தனர்.

கோவில்பட்டி, ஜூலை-3

சாத்தான்குளத்தை சேர்ந்த ஜெயராஜ் மற்றும் அவரது மகன் பென்னிக்ஸ் விசாரணை காவலில் மரணமடைந்தனர். இந்த வழக்கு உயர்நீதிமன்ற மதுரை கிளையின் உத்தரவின் படி சிபிசிஐடி வசம் ஒப்படைக்கப்பட்டுள்ளது. அதன்படி, பல்வேறு குழுக்களாக சென்று விசாரணை நடத்திய சிபிசிஐடி அதிகாரிகள் ஜெயராஜ் மற்றும் பென்னிக்ஸ் மரணத்தை கொலை வழக்காக பதிவு செய்தனர்.

மேலும், இந்த விவகாரத்தில் இன்ஸ்பெக்டர் ஸ்ரீதர், 2 சப்-இன்ஸ்பெக்டர்கள், ஒரு காவலர் என 4 பேரை சிபிசிஐடி போலீசார் கைது செய்தனர். தொடர்ந்து அவர்களிடம் 12 மணி நேரம் விசாரணை நடத்தினர். விசாரணைக்கு பின்னர் அவர்கள் அனைவரும் நீதிமன்ற உத்தரவின்படி சிறையில் அடைக்கப்பட்டனர்.

இதற்கிடையே, இவ்வழக்கில் தலைமறைவாக உள்ள காவலர் முத்துராஜை தேடப்படும் நபராக சிபிசிஐடி அறிவித்தது.

இந்நிலையில், தலைமறைவு குற்றவாளியாக அறிவிக்கப்பட்டு இருந்த காவலர் முத்துராஜ் கைது செய்யப்பட்டார்.

இன்று மாலை விளாத்திகுளம் அருகே காட்டுப்பகுதி ஒன்றில் இவரின் பைக் இருந்தது. இந்த பைக் கண்டுபிடிக்கப்பட்ட நிலையில் தற்போது முத்துராஜ் கைது செய்யப்பட்டுள்ளார். விளாத்திகுளம் அருகே பூசனூரில் வைத்து முத்துராஜ் கைது செய்யப்பட்டுள்ளார்.

Leave a Reply

Your email address will not be published. Required fields are marked *