ஜிஎஸ்டி தாக்கல் செய்ய தாமதம் ஆனால் அபராதம் கிடையாது- நிர்மலா சீதாராமன் அறிவிப்பு

ஜிஎஸ்டி வரி கணக்குகளை தாக்கல் செய்வதில் ஏற்பட்டுள்ள தாமதத்திற்கு அபராதம் விதிக்கப்படாது என மத்திய நிதி அமைச்சர் நிர்மலா சீதாராமன் அறிவித்துள்ளார்.

டெல்லி, ஜூன்-12

ஜிஎஸ்டி கவுன்சின் 40வது கூட்டம் இன்று காணொலி வாயிலாக நடைபெற்றது. பல்வேறு மாநிலங்களைச் சேர்ந்த அமைச்சர்கள் பங்கேற்று தங்களது முக்கியக் கோரிக்கைகளை முன்வைத்தனர்.
இந்த கூட்டத்தில் தமிழகம் சார்பில் கலந்து கொண்ட அமைச்சர் ஜெயக்குமார், நிலுவையில் உள்ள 2017-18 ஆம் ஆண்டிற்கான ஜி.எஸ்.டி. இழப்பீட்டு தொகை ரூபாய் 4 ஆயிரத்து 73 கோடி ரூபாயையும், 2018-2019 ஆண்டிற்கு நிலுவையில் உள்ள 553 கோடி ரூபாயையும், 2019-2020 ஆம் ஆண்டிற்கு நிலுவையிலுள்ள ஆயிரத்து 101 கோடியையும், மத்திய அரசு விரைந்து வழங்கிட வேண்டும் என வலியுறுத்தினார்.

கூட்டத்துக்குப் பின்னர் நிதி அமைச்சர் நிர்மலா சீதாராமன் கூறியதாவது:-

ஜிஎஸ்டி வரி கணக்குகளை தாக்கல் செய்வதில் ஏற்பட்டுள்ள தாமதத்திற்கு அபராதம் விதிக்கப்படாது. வருமான வரியை முழுமையாக செலுத்தியிருந்தால் ஜிஎஸ்டி வரி கணக்கு தாக்கலில் தாமதம் ஆனாலும் அபராதம் இருக்காது.

ரூ.5 கோடி வரை வர்த்தகம் செய்யும் சிறுகுறு தொழில் நிறுவனங்களுக்கு, பிப்ரவரி, மார்ச், ஏப்ரல் மாதங்களுக்கு தாமதமாக ஜிஎஸ்டி தாக்கல் செய்வதற்கான வட்டி விகிதம் 9% ஆக குறைக்கப்பட்டுள்ளது. செப்டம்பர் 30ம் தேதி வரை மட்டும் வட்டி விகிதம் குறைக்கப்படும். கொரோனா தாக்கத்தால் பாதிக்கப்பட்டுள்ள தொழில் முனைவோருக்கு உதவ நடவடிக்கை மேற்கொள்ளப்பட்டுள்ளது.

அனைத்து அமைச்சர்களின் வேண்டுகோளின் பேரில், ஜிஎஸ்டி இழப்பீட்டு தொகை வழங்குவது தொடர்பாக ஆலோசனை நடத்துவதற்காக ஜூலை மாதம் பிரத்யேகமாக ஒரு கூட்டம் நடத்தப்படும்.

இவ்வாறு அவர் கூறினார்.

Leave a Reply

Your email address will not be published. Required fields are marked *